کوئی بھی کام شروع کرنے سے پہلے کون سی دعا پڑھنی چاہیے؟

 بسم اللہ الرحمٰن الرحیم 

شروع اللہ کے نام سے جو بڑا مہربان نہایت رحم والا ہے 

ان شاءاللہ اس بلاگ پر روزانہ اسلامی معلومات پر مشتمل مختلف نوعیت کے سوالات  اور ان کے  مدلل جوابات ڈالے جائیں گے۔ 

سوال . 1 : کوئی بھی بامقصد کام شروع کرنے سے پہلے کون سی دعا پڑھنی چاہیے؟

اس سوال کا صحیح جواب ہے : 

D. بسم اللہ الرحمٰن الرحیم

حدیث پاک میں ہے كلُّ أمرٍ ذي بالٍ لا يُبدأُ فيه ببسمِ اللهِ الرحمنِ الرحيمِ، أقطعُ  ( ہر اہم کام جو اللہ تعالیٰ کے نام سے شروع نہ کیا جائے وہ ادھورا اور ناقص رہتا ہے)
  یہ روایت مختلف الفاظ کے ساتھ حدیث کی مختلف کتابوں میں ملتی ہے جیسے کنز العمال حدیث نمبر 24191، اور مسند احمد حدیث نمبر 8712 وغیرہ
    روایت بعض طرق سے اگرچہ ضعیف ہے لیکن اس مفہوم کی دیگر روایتوں کی وجہ سے بعض علماء نے اسے حسن لغیرہ بھی کہا ہے اور فضائل کے باب میں اس درجے کی روایتیں قابلِ قبول ہوتی ہیں،
   نیز ہر اہم کام کو خدا کے نام سے شروع کرنے کی تائید دیگر انبیاء ورسل کےعمل سے بھی ہوتی ہے
چناں جب حضرت نوح علیہ السلام نے طوفان سے بچاوٴ کے لیے، بحکم ِ الٰہی کشتی تیار کرلی اور مسلمانوں کو اس میں سوار کرلیا تو کشتی چلانے سے پہلے بحکمِ الٰہی فرمایا تھا :﴿ ارْکَبُواْ فِیْہَا بِسْمِ اللّہِ مَجْرَاہَا وَمُرْسَاہَا إِنَّ رَبِّیْ لَغَفُورٌ رَّحِیْم﴾․(سورہ ھود: 41)
    ترجمہ : اور نوح علیہ السلام نے فرمایا کہ (آوٴ) اِس کشتی میں سوار ہوجاوٴ، اندیشہ مت کرو(کیوں کہ) اِس کا چلنا اور اس کا ٹھہرنا (سب) اللہ ہی کے نام سے ہے، بالیقین میرا رب غفور رحیم ہے۔

اِسی طرح حضرت سلیمان علیہ السلام نے ملکہ سبا کو جو تبلیغی خط لکھا تو اس کا آغاز اِسی کلمہ سے کیا گیا ہے ،قرآن نے اُسے یوں بیان کیا ہے: ﴿إنہ من سلیمان وإنہ بسم اللہ الرحمان الرحیم﴾ (النمل : 30)
   ترجمہ : " یہ (خط) ہے سلیمان کی طرف سے اور وہ یہ ہے شروع اللہ کے نام سے جو بےحد مہربان نہایت رحم والا ہے"
    نیز خود نبی کریم صلی اللہ علیہ وسلم نے بھی مختلف کاموں جیسے کھانا کھانے، جانور کو ذبح کرنے  وغیرہ سے پہلے بسم اللہ الرحمٰن الرحیم پڑھنے کی تاکید کی ہے
    پس ثابت ہوا  کہ ہر اہم کام خدا کے مبارک نام سے کرنا چاہیے